دمعه مره / نسمه احمد

16.06.2013
17:22:10

دمعه مره / نسمه احمد 15806910

دمعه مره

نزله من عينى تطهر قلبى جوه

إنتى رحتى فين ياقوه

ضاعت القوه وراحت من سنه

يوم ما ضاع يوم ماضاع حلمى

وراح منى الهنا

إبنى أنا روحى أنا

أحمد ابن 23 سنه

راح وساب القلب يصرخ

يوم ماراح أحمد غريق

وسط موجه قاسيه تاه

حلم عمرى تاه معاه

كان ياناس قلبه برىء

فى عيونه لمعه حلوه

وف قلبه حلم جميل

كان بيزعق جوا بحر

قلبه صخر

كان يقول فين الدليل

والهروب ياناس ساعتها م القدر كان مستحيل

والعيون اتحجرت والعقل تاه

هيه دى نهاية الحياه ؟؟؟؟

ليه يابحر ليه ياقاسى بقلب صخر

ليه قلبت حياتنا ليه علقم وصبر

ليه يابحر بسألك جاوب عليا

واللا حتى الكلمه مستخسرها فيا

لأ صحيح قوللى ليه

إنت أخرس واللا إيه

إنطق أحسن هرمى طوب الدنيا كله جوا قلبك

وأفضل أصرخ فيك لغاية لما تنطق

واللا هرمى نفسى وسط أمواجك وشوف مين فينا اقسى

مش راح أسكت مش راح أنسى

بس بعد ماخدت منى حبيبى هقسى

قصدى يمكن أقدر أقسى بس أنسى ابن قلبى ابن عمرى

مستحيل مستحيل يابحر هنسى

كنت حوشته لأيامى اللى جايه

كل يوم يكبر شويه قلبى يفرح

أبنى أحلامى عليه وأقول بكره هفرح

بكره ييجى يقوللى يلا ياأمى بينا

لجل ماأخطب يحضنه قلبىوعنيه

وأجرى أجهز نفسى وألبس أحلى هدمه جابها ليه

وأنزل أشتريله بدله شفتها واتخيلته فيها

وقلبى يرقص بين ضلوعى وأقفل عنيه

العريس ابنى ياناس فرحتى كتيره عليا

فجأه أفتح عينى أنا وسط الزحام فين أنا؟؟؟؟

يمكن فى وسط الفرحه بين حلمى الكبير؟؟

بيقولولى طلعوه م البحر ميت

مين ياناس تحويشة العمر اللى انا حوشتها؟؟؟

طب رموها البحر ليه؟؟وليه يابحرمنى سرقتها؟؟

حلمى أنا اللى حلمت بيه وف ثوانى فقدتها

ليه يابحر أخدت منى حلم أيامى اللى جايه

ليه يابحر سرقت منى حتة الفرحه اللى ليا

ليه ياصخر طب جاوبنى حس بالحسره اللى بيا

وارجع اهدى واقول يارب رحمتك ابنى كان اجمل هديه

انت بس يارحيم اهدتها ليه

كنت فرحانه وفرحوا حبايبى بيا

يبقى هزعل ليه إذا خدت العطيه

برحمتك يارب صبر قلب أم

عالبلاء واكتبلها عيشه هنيه

» الافطار علي تمر / نسمه احمد
» الدنيا وما لها / نسمه احمد
» نور في القلب / نسمه احمد
» قال احد الصالحين / نسمه احمد
» في يوم من الايام / نسمه احمد